شباب 6 ابريل
من حق جيلنا أن يجرب فإما أن ينجح و إما أن يقدم تجربة تستفيد منها الأجيال

أحمد ماهر يكتب : حكاوى القهاوى

996

حكاوى القهاوى… تدوينة مالهاش لازمة.. وليها لازمة

وقت طويل مر على آخر تدوينة

لكن كل فترة والتانية لازم الواحد يكتب خصوصا ان معظم وسائل الاعلام بتحور فى الكلام.. الصحفى او الصحفية بيبقى عايز يبرز اللى هو عايز يقوله مش اللى انا عايز اقوله.. وكتير بيحور فى الكلام ويغير المعنى تماما.. او الديسك يختصر الحوار ويحط ليه عنوان سيكسى جذاب مشطشط فيغير معنى ومغزى الكلام بالكامل , أو مذيع او مذيعة بيقاطع كل شوية ومايخليش الواهد عارف يوصل فكرته أو بيحاول يوجه الحوار للسكة اللى هو عايزها

التدوين كان ولا يزال هو الحل

تدوينة انهاردة عن حكاوى القهاوى

فيه مجموعة قهاوى معظمها معروف , وفيها شلل معروفة, كل مهمتهم هى اختراع حكاوى وحواديت ورغى واشاعات

وفيه ناس يمكن ما بتقعدش على القهاوى دى لكن بتحب الحكاوى , وشغلهم كله اختراع حكاوى وحواديت, يمكن عمرهم ما نزلوا من بيوتهم وقعدوا على قهاوى الحكاوى لكن بيحبوا يعملوا حكاوى بتروح لشلل القهاوى يقضوا بيها وقت فراغهم.

بعض الحكاوى اللى اتقالت الاسبوعين اللى فاتوا من محترفى الحكاوى على القهاوى او من بيوتهم على تويتر والفيسبوك

الاخوان واحمد ماهر بيمثلوا واعتقال ماهر من المطار تمثيلية لتلميعة

ماهر اخوان وخلية نايمة

حتى لو اعتقلوه بجد يستاهل

طيب ليه ماهر خرج وناس تانيه لسه ماخرجوش.. يبقى اكيد صفقة وتمثيلية وخلية نايمة

حتى حادثة العربية تمثيلية

دا كان عنده عربية 128 قبل الثورة, اكيد خيرت الشاطر والبلتاجى هما اللى جابوله العربية الجديدة تمن الصفقة معاهم

يعنى ازاى لسه عايش لغاية دلوقتى والعربية اتفعصت, خرج ازاى.. دى اكيد تمثيلية

حكاوى مريضة بينتجها خيال مريض لشخص عنده اضطراب نفسى

مش دول وبس شوف الطرف الاخر وحكاوى القهاوى الاخوانية

دا ماهر و6 ابريل متعمدين يعملوا مظاهرات عند بيت الوزير علشان يتقبض عليهم ويقووا ان مرسى رئيس قمعى

دا مصطفى خاطر الفلول هو اللى حبس ماهر بس النائب العام هو اللى خرجه ومرسى كويس وماهر تحالف مع الفلول وبيشتم مرسى عالفاضى

ماهر بيمثل انه عمل حادثة بالعربية علشان يقول ان الاخوان قاصدين يقتلوه

ماهر اصلا جاب عربية جديدة منين وهو كان معاة 128, اكيد فلوس الفلول والعلمانيين واعداء الاسلام وتمويل شفيق وممدوح حمزة

ماهر باع ضميرة وشغال لحساب الاخوان

ماهر باع ضميرة وشغال لحساب شفيق والفلول واعداء الاسلام

خيال مريض سواء فلول او اخوان او ثورجيين جدد.. او ناس فاضيين بيزهلوا لما يسمعوا كلمة احمد ماهر

حكاوى قهاوى

رغم انها من خيالات مريضة وناس لازم تلحق نفسها وتشوف طبيب نفسى لكن يبقى افضل لو نمسك نقطة نقطة علشان فيه شباب صغير فى السن بيبقى عنده ميول للاستماع لحكاوى القهاوى فنلحقهم قبل ما عقولهم تتلوث بالقصص العبيطة.

نمسك حكاية حكاية

يتلمع!

يتلمع ازاى وليه اصلا

يعمل نفسه ثورى!

مش بحب المزايدة ولكن فيه سؤال لازم سؤاله علشان كل نضع الامور فى نصابها

لو الناس اللى بقالهم سنين ضد مبارك ودخلوا السجن ايام مبارك وتعرضوا لتعذيب وحبس ورفد من الشغل ايام مبارك.ورفضوا صفقات الاجهزة الامنية ايام مبارك بإنشاء حزب معارضه كرتونى فى مقابل وقف الملاحقة الامنية وفتح المجال السياسى والاعلامى. ودعوا للنزول يوم 25 يناير و تعرضوا لحملة تشوية شرسة ومنظمة من المجلس العسكرى خليفة مبارك .. لو الناس دول مش ثوريين … طب إيه؟

مين ثورى دلوقتى؟

شفيق؟

للأسف فيه ناس معاييرها ماشية بالعكس

فيه ناس الغل والشر اللى جواهم خلاهم يشمتوا ويفرحوا لما الواحد يتحبس ويزعلوا انى خرجت من السجن او قعدت يوم واحد فقط

ويزعلوا إن ربنا نجانى من حادثة صعبة على الطريق الدائرى

سبحان الله

الناس دى ليه كده؟

وازاى عاملين نفسهم ثوريين وبيدافعوا عن مبادىء

وازاى بعضهم بيقود حركات بتقول على نفسها ثورية

وازاى البعض منهم على الجانب الاخر بيتكلم بإسم الدين وقلبة مليان بكل هذا الغل والكراهية؟

————–

س و ج من حكاوى القهاوى

أعتتذر للناس العاقلين على تفاهة بعض الاسئلة او استفزاز بعض الاجابات ولكنها عينة من اسئلة واجابات تأتى يوميا لى على الانترنت وتتداول فى بعض المقاهى

لو استفزتك تفاهة بعض الاسئلة او غلاسة بعض الاجابات من حقك تقفل الصفحة

س : ازاى خرجت سليم من حادثة العربية رغم العربية اتفعصت بالكامل وكل اللى عندك شوية جروح وكدمات خفيفة؟

ج: قضاء ولطف من الله

انا نفسى ماعرفش ازاى خرجت من العربية. بس خرجت الحمدلله .. دا فضل من ربنا وحده .. ورسالة هامة

لو زعلان قوى انى خرجت سليم, بصراحة مش لاقى كلام اقولهولك

س: ازاى عندك عربية أصلا, ومش ده يعتبر دليل على التمويل من خيرت الشاطر والاخوان وحليفتها امريكا( اذا كان السائل فلول او متثورج جديد أو متثورج قديم بس جواهم مش كويس)

ومش دا دليل على التمويل من الفلول وشفيق وامريكا والامارات(اذا كان السائل من التيار الاسلامى بس برضه جواه مش كويس)

ج: ـأولا لو مهندس مدنى خريج 2004 مش هايبقى الغريب انه عنده عربية .. الغريب يبقى انه ماعندوش عربية

ثانيا العربية مش فخمة .. دى رينو لوجان وتعتبر سيارة شعبية

ثالثا العربية مش جديدة .. العربية موديل 2011 ودفعت المقدم فى 2010 قبل الثورة بأسابيع واستلمتها بعد الثورة بعد ما البنوك والشركات فتحت تانى

رابعا .. العربية بالقسط أصلا ولسه فاضل عليها 12 قسط .. انت ممكن تجيب واحدة. مش قصة يعنى .. اضغط على نفسك شوية واعمل جمعية..وادفعها مقدم وقسط الباقى .. ودلوقتى ممكن تدفع 10% مقدم من تمن العربية بس هاتتعب جامد فى الاقساط

س: هل الحادثة عادية ولا فيه شبهة

ج: الله اعلم , ولكن الحمدلله على كل شىء

ولكن حصلت حاجات كتير بعد الحادثة وعدة حوادث سرقة لا اعتقد انها صدفة

س: هل العربية متأمن عليها؟

ج: طالما العربية بالقسط يبقى غصب عنى بأمن عليها .. ولكن التامين بطبعه غلس وفيه اجراءات كتير جدا لغاية ما يبقى فيه تعويض كنسبة من العربية وقد تستمر الاجراءات لشهور.. والله اعلم

س: ليه تم الافراج عنك بعد يوم واحد من اعتقالك ولسه بعض الناس جوا وماخرجوش؟

ج: لإن القضية مختلفة بالكامل

انا كانت التهم معايا هو التحريض على التظاهر أمام منزل وزير الداخلية والتحريض على اهانته والتحريض على التظاهر اكثر من 5 اشخاص والتعدى على السلطات واصابة رجال الشرطة

وتم القبض عليا بعد ما تم الافراج على الزملاء اللى تم اعتقالهم وقتها اساسا فالقضية تعتبر خلصت اساسا والقبض عليا مجرد غلاسة وتخويف لباقى الناس

والتهم اصلا تفاهة وغير مترابطة والاتهامات كلها متفبركة ومختلقة

بجانب ان حصل تحرك سريع وكبير من الحركة ومن ناس كتير وده اثر كتير

وبصراحة لو عايزين نفرج عن باقى الناس اللى لسه جوا السجن فالمفروض نتحرك

انت نفسك ياللى بتسأل وبتزايد ليه ماشوفناكش فى اى جهود للمطالبة بالافراج عن المعتقلين؟

ولا هى مزايدة عالنت أو عالقهاوى وخلاص

وفى الاخر على فكرة كله ان شاء الله هايخرج علشان اصلا التهم ملفقة

انا عن نفسى بحاول اتكلم واساعد فى المجهود للافراج عن المعتقلين خصوصا دومة او الشباب اللى قابلتهم فى سجن العقرب

والتحرك بيبقى سياسى أو اعلامى أو احتجاجى

انا بحاول

انت عملت ايه ياللى بتزايد؟

س: ليه خرجت بسرعة من السجن؟ مش دا يعتبر صفقة مع الاخوان؟

ج: والله لو اتحبست شهر هاتقولوا اتحبست شهر واحد بس ليه , ولو اتحبست سنة هاتقولوا اتحبست سنة واحدة بس ليه

ولو بتحسبوها بالحبس .. فأنا اتحبست كذا مرة أيام مبارك.. بعض الحبسات قعدت شهور فى السجن وبعضها كان فيها تعذيب فى مبنى امن الدولة

حتة مزايدة سخيفة… أيام مبارك لما كان بعض اللى بيزايدوا دلوقتى بيخافوا يجيبوا سيرة مبارك فى سرهم .. وأيام ما كان بعض اللى عاملين ثوريين دلوقتى بيقولولى خليك ماشى جنب الحيط وبلاش تخبط فى النظام واللى بتعمله مش هاينفع وعمر ما هاتحصل ثورة فى مصر .. فاكرين ؟

س: انت ليه مش ضد مرسى والاخوان؟

ج: مين قال؟

احنا من وقت استشهاد جيكا ثم الاعلان الدستورى ثم الاصرار على الاستفتاء على الدستور واحنا قطعنا كل العلاقات تماما مع مؤسسة الرئاسة ومع الاخوان.

وساعتها قولنا علانية اننا هنعامل نظام الاخوان كنظام مبارك

ومن هذا الوقت واحنا بنشارك فى كل المجهود اللى ضد نظام الاخوان .. وفيه ناس من عندنا اصيبوا فى مظاهرات ضد حكم الاخوان

س: طب انت ليه مش بتقول يسقط يسقط حكم المرشد ؟

ج: قولت وهتفتا وقولت فى برامج ونزلت بيانات ضد حكم المرشد

المفروض اعمل ايه تانى … المفروض اقول الكلمة دى كام مرة فى اليوم علشان ابقى ثورى وكده؟

طب يسقط يسقط حكم المرشد … يسقط يسقط حكم المرشد.. يسقط يسقط حكم المرشد

كدة خلاص بقيت ثورى؟ اقولها كام مرة تانى؟

دا لو نزلنا كل يوم نشتبك مع الاخوان بسلاح وخالفنا منهج اللاعنف بتاعنا برضه هتلاقى اللى يزايد ويقول 6 ابريل بتمثل انها بتشتبك مع الاخوان بسلاح

حاجة تقرف

س: طب انت ليه لم تنسحب من الجمعية التأسيسية؟

ج: انسحبت فى المجموعة اللى انسحبت, مين اللى قال انى ما انسحبتش؟

كل ممثلى القوى المدنية حاربوا داخل الجمعية التأسيسية من اجل صدور دستور يليق بمصر .. وعندما اتضح ان مفيش أمل وإن الاخوان مصممين على اقرار دستورهم وغيروا كل ما تم لاتفاق عليه فى البداية

كله انسحب وفضح اللى حصل جوا التأسيسية

وبرضه الاخوان مرروا دستورهم

التركيز على احمد ماهر فقط فى موضوع التأسيسة واللى يقول اصله انسحب متأخر 5 دقايق و اصل انسحب متأخر 6 دقايق ..يدل على إن الموضوع شخصى .. ومروجى هذا الكلام غير موضوعيين بالمرة

س: طب اي موضوع يحى حامد وصفحة كارلوس لاتوف؟

ج: هو مبدئيا صفحة كارلوس لاتوف مالهاش اصلا اى علاقة بكارلوس لاتوف

وكل مجهودها دلوقتى هو فقط نشر اى اشتغالات والتركيز على احمد ماهر ,

ولكن احنا نفسنا معترفين وكل الدنيا عارفه اننا لغاية وقت استشهاد جيكا ولغاية الاعلان الدستورى ولغاية تمرير الدستور .. كنا بنحاول ننصح وبنحاول نتواصل ونبعت أفكار ومشاريع لانقاذ مصر

حتى د البرادعى وحمدين وعمرو موسى ود ابو الفتوح برضه قابلوا مرسى فى شهر اكتوبر فى محاولة منهم لإحداث توافق

وكله بعدها تأكد ان الاخوان مش عايزين الا البقاء فى السلطة وفقط ومش عايزين مصحة البلد ولا عايزين استقرار ولا عايزين توافق وبناء حقيقى

الناس كلها حاولت وعملت اللى عليها وقدمت ايديها للاخوان … لكن الاخوان هما اللى رفضوا التوافق

التواصل مع الرئاسة قبل اكتوبر 2012 مش عيب ولا فضيحة

كان هناك نوايا طيبة ومحاولات لانقاذ البلد واقناع للاخوان بضرورة المشاركة وضرورة تنفيذ وعودهم

ليه المزايدة فى هذا الامر … وليه المزايدة على احمد ماهر تحديدا انه كان على تواصل مع مؤسسة الرئاسة لغاية اكتوبر 2012؟

إيه الهدف والمغزى من هذه المزايدات؟

س: ليه دعمتوا مرسى فى الانتخابات الرئاسية؟

ج:قبل ما ندعم مرسى فى المرحلة الثانية .. بذلنا مجهود كبير قبل الجولة الاولى لإقناع المرشحين المحسوبين على الثورة إن أحدهم يتنازل للاخر وضرورة توحيد مرشح واحد

وحذرنا كتير علانية ان تعدد المرشحين المحسوبين على الثورة وتفتت الاصوات على كذا مرشح هايؤدى لكارثة

وقولنا لازم يتم التنازل ويتم نقديم مصلحة الوطن بدل من الإصرار على تفتيت اصوات الثورة

ورفضوا الاستماع لنصائحنا ونصائح غيرنا

وفى الجولة التانية لما كان الاختيار بين السىء والاسوأ اخترنا الاقل سودا

وعلى فكرة

راجع صورة فندق فيرومونت

هتلاقى ناس من اللى دلوقتى عاملين نفسهم ثوريين قوى وبيزايدوا على احمد ماهر . كانوا حريصين يكونوا خلف مرسى ويتصوروا معاه فى فندق فيرمونت

راجع الصورة كويس

س: مش يمكن شفيق كان يبقى احسن؟

ج:ماينفعش مدعم مرشح النظام القديم, وكان ساعتها هايبقى الفساد والاستبداد وعودة شبكات المصالح وعودة كل ما ثرنا ضده .. كان هايبقى علنى ورسمى وقانونى

وكان كمان هايبقى الاخوان ساعتها هم المعارضة الرئيسية الثورية فى مصر

ادينا جربنا حكم الاخوان والمصريين كلهم تأكدوا عن طريق التجربة ان الاخوان فاشلين وكاذبين ولا يهمهم غير السيطرة وبقاؤهم فى السلطة وفقط.

س/ طيب ليه ما اخدتوش الطريق الثورى وقاطعتهم الانتخابات؟

ج: اللى يتكلم عن الطريق اثورى والمقاطعة يبقى بيستخدمها من الاول

ماينفعش حد يشارك فى اللعبة بقواعدها شوية وبعد كده ييجى يقولك انا ثورى ومقاطع

يا تشارك من البداية للاخر يا تقاطع من البداية للاخر

طيب افكركم بحاجة اقدم

انتخابات مجلس الشعب 2011 … حركة 6 ابريل وأحمد ماهر قاطعوا اللعبة ولم يشاركوا فى الانتخابات ولم يقدموا مرشحين لإننا قولنا اللى بيحصل تمثيلية

فى حين ان حركات 6 ابريل المزيفه والائتلافات الثورية واحزاب كتير قدموا مرشحين فى الانتخابات

وفيه كمان احزاب وتيارات ثوريين وبيزايدوا على 6 ابريل دلوقتى وكانوا نازلين انتخابات مجلس الشعب 2011 على نفس قوايم الاخوان

تانى كانوا نازلين على نفس قوايم الاخوان

احنا مش بنحب نزايد ولا نقول احنا اكتر ثورية منكم والمزايدات الرخيصة دى

فبلاش مزايدات علينا احنا بالذات

محدش يزايد على 6 ابريل” الاصلية” اللى كانت كل يوم بتنزل وتتحدى مبارك وسط تجاهل وسخرية الكثير من الاحزاب وشخصيات المعارضة, ووسط ما كان كتيييير من الشخصيات اللى بتزايد علينا دوقتى كانوا بيساندوا مبارك او بينصحونا اننا نبطل تحدى مبارك ونبقى اذكياء ونسمع الكلام احسن.

اللى عايز طريق ثورى من البداية .. فيبقى ثورى ويقاطع من البداية ويوقف التمثيلية الانتخابية من البداية

مش ينزل الانتخابات مره وينزلها على قوايم الاخوان مرة ويقاطع فى وقت تانى لما يخسر.

س: طيب تقول ايه فى الكلام اللى انك بعت الثورة وانك بتاخد تمويل من البلتاجى وخيرت الشاطر وانك بتدور على منصب؟

ج: نفس الناس التافهة اللى بتقول الكلام ده هما اللى قالوا قبل كدة انى بتمول من امريكا وصربيا

كان الاول النغمة عن تمويل من امريكا وصربيا ودلوقتى اصبحت البلتاجى والشاطر

قصص بيخترعها خيال مريض

وهتلاقى اللى بيقول الكلام التافه ده او ده هو نفس الناس بالاسم.. اكيد انتوا تعرفوهم اكتر منى

بالنسبة للمناصب

فى 2008 بعد الاضراب وبعد يومين من التعذيب فى مبنى امن الدولة فى لاظوغلى جالى الظابط اللى عامل طيب و عرض عليا اعمل حزب اسمه 6 ابريل ويبقى حزب رسمى

واطلع فى التليفزيون اكتر وابقى زى باقى احزاب المعارضة الرسمية.. بس بشرط انى انسق معاهم قبل أى حاجة واسمع الكلام

زى ما كان بيعمل الاغلبية العظمى من احزاب المعارضة فى ذلك الوقت

وقاللى دا الدكتور فلان والصحفى فلانبييجوا هنا ويقابلونا عادى وبرضه رموز معاضة .. والتعاون مع امن الدولة مش خيانة.

ورفضت .. وكانت النتيجة ان فضلت حركة 6 ابريل فى مراقبة دائمة ومطاردات دائمة وحصلت اعتقالات كتير فى معظم انشطتها لغاية 25 يناير 2011 … ولغاية انهاردة على فكرة

وعلى فكرة .. بالنسبة للناس المريضه اللى قالت التأسيسية صفقة ومنصب …التأسيسية ماكانتش منصب ولا سلطة ولا كان ليها مرتب … الواحد ماخدش منها غير التخوين والشتيمة وقلة الاداب … وانسحبت منها فى الوقت اللازم وشاركت فى اثبات كذب الاخوان وسوء الدستور لإنى كنت شاهد من جوه

وبعد الانتخابات الرئاسية تم العرض عليا انى اكون مساعد رئيس الجمهورية شئون التواصل المجتمعى … ورفضت برضه .. رغم ان فيه ناس كتير محترمين نصحونى بالقبول والمشاركة فى صنع القرار ومحاوة التوجيه للطريق الصحيح من الداخل

ولكن انا رفضت علشان اصلا مش عايز منصب رسمى

وتأييدى لمرسى كان لاسقاط شفيق وليس طلبا لمنصب

ولوضوح ان الاخوان مش جادين فى موضوع المستشارين والمساعدين وان اى مساعد او مستشار من خارج الاخوان هايبقى منصبه هامشى وصورى … ودى حصل بالفعل …وشوفنا بعدها ان كل الناس المحترمين من خارج الاخوان اللى قبلوا يدخلوا جوا مؤسسة الرئاسة ويحاولوا يصلحوا من الداخل كلهم استقالوا وقالوا ان منصبهم جوا صورى

وانا عن نفسى بحترمهم جميعا واثق فيهم ولا احد يزايد عليهم زى د سمير مرقص وعصمت سيف الدولة ود سيف عبدالفتاح ووالكاتبة سكينة فؤاد و دعمروالليثى وأخرين

كلهم ناس محترمين ولما دخلوا جوا مؤسسة الرئاسة كان بنوايا طيبة للاصلاح ولما تأكدوا ان الموضوع تمثيلية استقالوا

س: طيب ليه مش بتشاركوا فى كل الاحداث اللى بتحصل ضد الاخوان؟

ج: بنشارك طبعا

ولكن فيه كذا نقطة لازم توضيحهم

اولا احنا منهجنا هو اللاعنف … وغير كدة كمان .. قناعاتنا ان العنف بيسبب ضرر كبير.. وبيخلى الشعب اللى احنا المفروض بنشتغل علشانه يقرف مننا ويبتعد عن المشاركة … والعنف بيتم استغلاله من السلطه كويس ضدنا وبيديهم المبررات للقمع والقتل… فطبيعى احنا مش هنشارك فى حاجة فيها عنف هجومى ومولتوف وخرطوش … دى ثوابت أسسنا الحركة عليها مش مجرد سياسة او استراتيجية

ثانيا لما يتم الدعوة لحاجة من بعض المجموعات ويتفقوا على الشكل من غير ما يتم دعوتنا ومانعرفش الشكل ولا المسار, المفروض الناس تبقى عارفه هانشارك ازاى وعنوان اليوم وخطته واحتمالاته

مش انزل يا جدع وفين 6 ابريل

احنا مش مقاولين انفار

المفروض أى حدث يتم الدعوة له يبقى معروف ليه, وامتى, واهدافه ونتائجه

وممارسة الارهاب الفكرى ضد 6 ابريل وتخوينها بسبب عدم مشاركتها فى “بعض ” الاحداث الغير مفهومة او غير مخطط لها يعتبر اسلوب سىء … ومش هايخوفنا .. والتخوين والارهاب الفكرى من بعض المجموعات ضدنا مفيش فرق بينه وبين التخوين والارهاب الفكرى الذى يستخدمه الاخوان ضدنا

اللى بيبقى عايز ينظم حاجة وعايز الناس تشارك المفروض يبعت ولو حتى ايميل ويقول انعمل كذا علشان كذا وشاركوا معانا.

لكن شغل كل يوم مظاهرة وكل يوم تتحول لاشتباكات… ده عمره ما هايحقق أى نتيجة اطلاقا

وكتر المظاهرات مش معيار للثورية, والمفروض ان الناس جربت بنفسها ان كتر افتعال الاحداث وتكرارها بدون مغزى بيخلى الناس تبعد وبتفقدها التعاطف الشعبى

وماينفعش ان اللى عايز ينزل عمال على بطال يقعد يزايد ويخون اللى بيفكر فى الجدوى قبل النزول او بيدور على الحاجات اللى تعمل تعاطف شعبى

والمفروض اننا بنشتغل للشعب وعلشان مصلحة الشعب. فالمفروض مانعملش حاجة بيقرف منها الشعب ونتهمه بالجهل واننا عارفين مصلحته اكتر منه.

س: نازل يوم 30 يونيو وهل شغال فى تمرد؟

شغالين فى تمرد كل يوم فى كل المحافظات فى كل المناطق وبنجمع كل يوم مئات من التوقيعات وربما آلاف رغم عدم وجود امكانيات وحتى الورق بنصوره على حسابنا ورغم تعمد التجاهل

ولكن مقتنعين بأهمية حملة تمرد واهمية عودة الايجابية وعودة الروح الثورية للشارع المصرى

ويوم 30 يونيو يوم مهم ولازم يتم التجهيز له بشكل جيد علشان ينجح

ولو نجح هايبقى خطوة مهمه فى طريق استكمال الثورة

ولو لا قدر الله لم ينجح فلازم نكمل تانى وتالت ورابع علشان المبادىء والقيم والحلم اللى بنحلم بيه يتحقق

س: ايه رأيك فى اللى بيشكك فى مشاركة 6 ابريل فى تمرد أو رافض مشاركة 6 ابريل فى تمرد أو بيخون فى 6 ابريل رغم مشاركتها فى تمرد؟

ج: اللى بيخون فى 6 ابريل واللى بيشكك فيها واللى عايز يستبعدها فده شخص او ممجموعة نواياهم مش سليمة وبيحاول يشق الصف

وسواء لو كان بيعمل كده متعمد او غباء او حقد او غل او انخداع فى اشاعات فارغة فده كده بيخرب وبيشق الصف وبيضعف صف المعارضة وبيقوى صف النظام

واخيرا بعتذر لكل اللى شايف ان التدوينة دى ماكانش ليها لازمة وان الناس اللى عقلياتها مريضه وبتفكر بالمنظر ده لا يجب تضييع الوقت فى الرد عليهم

ولكن برضه هاذكر ان التدوينه دى للناس اللى بتفهم وتأثرت شويه بالشائعات وعايزة تستفسر

لكن كل الفلول أو الاخوان أو مؤيدى العسكر .. أو اللى محسوبين على الثورة لكن قلوبهم مليانة حقد وغل ومؤامرات …. دول كلهم واحد بالنسبالى ورأيهم لا يهم اطلاقا .. ومحاولاتهم للارهاب الفكرى مش هاتنجح

قد يعجبك ايضا
تعليقات
Loading...