اختار بالعقل

اختار بالعقل
470

بقلم : سامح رشدى

قبل ما تروح لجنة الانتخابات وتدي صوتك لواحد منهم، لازم تبقى عارف انت بتديلو صوتك ليه، مش لأنه من عيلة كبيرة أو بيتكلم كويس، ولا عشان شغل ابنك في الحكومة، ولا عشان كلم وزير الأسفلت عشان يسفلت شارعكو، ولا كلملك وزير النقل عشان ينقل بنتك لمدرسة قريبة.

لازم تبقى عارف الفرق بين عضو المجلس المحلي ونائب البرلمان(مجلس الشعب ومجلس الشورى) وتبقى عارف إن النائب ده بيوافق أو بيرفض القوانين اللي بتتعرض على البرلمان زي مثلا قانون الطوارئ مؤخرا، كل نواب الحزب الوطني وافقوا عليه، الضرائب الجديدة على الأسمنت والسجاير لدعم ميزانية الصحة هما اللي وافقوا عليها، انت بتدفع ضرايب، اسأل نفسك بتلاقي قصادها خدمات؟ والسبب النواب اللي في المجلس،النواب دول هما اللي المفروض يحاسبوا الحكومة، عملت إيه ومعملتش إيه وما عملتوش ليه، وكان مفروض يسحبوا منها الثقة (يعني يرفدوها) لما حصلت أزمة العيش والغاز والجاز وغرق العبارة وحريق القطار وأكياس الدم الملوثة، وقرارات علاج على نفقة الدولة (يعني على حسابك من الضرائب اللي انت بتدفعها) بآلافات وملايين علشان واحد يزرع طقم أسنان، النواب هما اللي بيوافقوا على ميزانية الصحة والتعليم اللي رايحين في داهية، وفي نفس الوقت بيوافقوا على ميزانية زي الداهية للداخلية لقمع المعارضة، والإعلام لتزييف الحقائق وتغييب العقول، والمؤتمرات والرحلات والبدلات و و و .
التزوير في الانتخابات بيحصل لأنك ما بتروحش، وبتقول اللي هما عايزينو هو اللي هييجي، لازم تروح وتلحق تختار واحد يكون جاي مرة واحدة باختيارك انت وبصوتك انت مش بالتزوير.

تعليقات

Loading...

قد يعجبك ايضا