ا” 6 ابريل .. يا حركة من شباب صالحة”

ا" 6 ابريل .. يا حركة من شباب صالحة"
4٬671

6 إبريل
يا حركة من شباب صالحة
يا فكرة فى صدور جامحة
يا جامعة ميشيل وأحمد ونبيل
وماريان وفاطمة بالطرحة
********
يا حركة بصوت فى صمت رهيب
يا كاسرة حاجز اسكت عيب
مش ياما قالوا ع اللى فى طرة أسيادنا
وشبابنا عنه الإحترام بيغيب
******

وبالإحترام سنين ضحكوا علينا
ده غير بالظلم بكّوا عنينا
وبالسرقة فضوا كل جيوبنا
وبالحرقه تعبوا قلوب أهلينا
******
فقلنا أكيد هنعمل دور
ده كام ديب فى البلد بيدور ؟
ولو علقنا فديله قالب
ما هيتعدل أصل البعيد مسعور
******
فحلفنا فى 6 من إبريل
لننزل نجيب حق كل ذليل
ونبقى نبض قلب الشارع
نأدى رسالة نبقى دليل
******
وما فكرناش فيوم هنكون
بداية لثورة هَزه الكون
وشهدائها بالآلاف ضحوا
بعيونهم وروحهم فدا مصر تهون
******
وحاولوا يشوهوا الصورة
وبمكر قال !! بيلعبوا الكورة
وقالوا خدنا تمويل من الخارج
وأفتكروا العرضة مكسورة
******
ونزلنا بفكر نغازلهم
وسألنا اخدنا كام منهم ؟
وقدمنا بلاغنا للنائب
وقولنا حقنا بعينهم
******
لكن شعبنا واعى جميل
ومين يغلب اللى داق من النيل
وصحيح اللعبة معروفة
لكن إحنا شباب إبريل
******
إدينا نضيفة وفى عنيكوا
ورونا بقى انتوا إيديكوا
وإزاى بالنهب والتدليس
وبالظلم هُنّا بقى عليكوا
******
ده قالوا زمان وفى الأمثال
وحِكم فى الكلام تنقال
لو بيتك من إزاز مسروق
متحدف طوب ع اللى بيته حلال
******
ووعدين هنكمل المشوار
وبقوة هنواجه التيار
ولو حاولوا يعارضونا
ده مين ده !! اللى يعاند الثوار
******
شعارنا قبضة ( كف فى إيد )
ولاخر نبضة قلوبنا حديد
وطول ما الناس بتحضنا
صوت الحق جوانا عنيد
******
يا بلدنا إحنا للتاريخ شامة
وحفرنا بإسمنا علامة
وأمانة إكتبينا من العاشقين لجنابك
ولاد جدعة بشهامة
******
وأكيد ثورتنا منصورة
وبإيدينا هنكمل الصورة
ومش هيضيع ولا حق شهيد
وهتطلع الفرحة اللى محصورة
******
ده شبابنا مش شباب عادى
وللى كاره مصر بنعادى
وحلمنا بلدنا تعلى لفوق
ونردد بالغنا بلادى
بلادى بلادى بلادى

تعليقات

Loading...

قد يعجبك ايضا