شباب 6 ابريل
من حق جيلنا أن يجرب فإما أن ينجح و إما أن يقدم تجربة تستفيد منها الأجيال

عمرو عز احد المقبوض عليهم يروي قصة القبض عليه وكيف جرى اليوم

558

[size=small]يوم غريب ، احنا نازلين انا ومحمد عادل من مقر جريده الغد قالي احنا شكلنا هنتحبس انهارده ، ليه يا محمد
مش عارف
كان حاسس بكده
وقبلها عمرو اسامه بيقوله انا عمري ما دخلت قسم شرطه ونفسي ادخل اي قسم اشوفهم بيعملوا ايه
كانت الساعه حوالي 12 ص
نزلنا الشارع وكان معانا محمد عاطف ومحمود سامي
محمد كتب لا للتوريث و شباب 6 ابريل علي الكبينه بتاعت الكهربه ومشينا عادي
عسكري معدي شاف الكلام راح مكلم ضابط والضابط وقفنا يسالنا علي البطاقه انا ومحمد عاطف ومحمود سامي
م[/size]

 

[size=small]حمد عادل كان مشي قدمنا هو وعمرو اسامه
واحنا واقفين بنتكلم مع الضابط سمعنا صوت عالي
الضابط راح جاري
خليت محمد عاطف ومحمود سامي يمشوا بالكتب الي كانت معاهم وقلتلهم انا هخلص الموضوع
رحت اتكلم مع الضابط والناس الي مسكين محمد لقيتهم قاعدين يضربوا فيه بطريقه بشعه
حاولت امنعهم انهم يضربوه راحوا ضاربني انا كمان
بقينا نهتف ونضرب وننضرب
وبقيت لمه وعمرو اتدخل بالرغم من ان ذراعه مكسور
كتروا اوي وبقي الضرب جاي من كل حته
بقي كل واحد حوليه مش اقل من خمسه افراد ما بين مخبرين وامناء شرطه
شارع 26 يوليو اتشلت الحركه فيه والناس بقيت واقفه تتفرج علينا لحد ما دخلونا شارع جانبي
لما دخلنا الشارع بقوا هما بس الي بيضربوا
كانت الحكايه خلصت احنا ثلاثه وهما حوالي عشرين حيوان
في الشارع الجانبي فضلوا يشتموا ويضربوا فينا لحد ما جابو عربيه بوكس وخدونا علي القسم
واحنا راكبين البوكس امين شرطه قاعد يقول انتو بتشتموا مبارك دا مبارك ده هو الي بياكلنا وياكلكوا يا ولاد التيت

في القسم

اول ما دخلنا القسم فضلوا يضربوا ويشتموا فينا بطريقه غريبه
واحنا طالعين علي السلم لقيت امين شرطه ماسك سجاره حشيش بيشربها في الممر في الدور الثاني بصراحه انا اتخضيت علشان فهمت ان القسم كده مباح ان يتعمل فيه اي حاجه
دخلونا لضابط معرفش اسمه ايه
فاهمته ان انا محامي بس حسيت انها مفرقتش معاه (بلد بتاعت شهادات صحيح)
اتكلم معانا
واخدوا مننا بطاريات التليفونات
وبعد كده قعدونا في غرفه وفرقونا علي اماكن في القسم
محمد عادل قعدوه في الغرفه الي بيستقبلوا فيها المجرمين
وعمرو اسامه غاموا عنيه ودخلوه الحجز
وانا قاعدوني في غرفه المعلومات (غرفه مكيفه وانا سيبتلهم فيها 2 ايدي من بتوع 6 ابريل خبيتهم في علبه محطوطه علي مكتب الضابط )علشان يبقوا يفتكرونا
طلبت اني اقابل الضابط جه لحد عاندي
قلتلوا علي فكره انا مش هاسكت والنقابه هاتجبلي حقي منك ومن اي حد عمل معايا حاجه في القسم قالي اصبر وانا هعملك الي انت عايزه
خرجت من الغرفه علشان اروح الحمام الشخص الي ماشي معايا شارو لواحد وقالوا علي فكره الواد ده(شاور علي واحد واقف علي جنب) معاه حاشيش وبرشام ترمادول
قال انا عارف
قال انا قلت اقولك علشان لما تخدهم منه تبقي تديني منهم اي حاجه
يعم غور دا هما كلهم نص صباع وبرشمتين هاديك منهم ايه

رجعت تاني علي غرفه المعلومات جه ضابط تاني
انت استاذ عمرو
انت كنت جاي تشوفهم واحنا حجزناك
وبعدين
ممكن شويه كده تمشي
امشي لوحدي
اه
لا انسي انا مش هامشي من هنا غير وهما معايا
لو هنمشي كلنا ماشي لكن لو انا لوحدي انسي
سابني ومشي
كنت قلقان اوي علي عمرو اسامه علشان محمد عادل مر بالتجربه دي قبل كده لكن عمرو كان بيشوف الشغل ده في الافلام بس
وحصلت حركه انضباط غريبه في القسم كله
وعرفت ان المأمور بتاع القسم علي وصول
بعد كده دخلونا احنا الثلاثه حجز نضيف كحجز

وصول الدكتور ايمن نور والاستاذ ايهاب الخولي

اتفاجئنا بالدكتور ايمن نور والاستاذ ايهاب الخولي رئيس حزب الغد واحد المحامين ومعاهم مامور القسم دخلوا الحجز والمحامي قالي انت كنت داخل تسأل عليهم وهما حجزوك
حسيت ان المأمور بيبصلي علشان اقوله ايوه
قلتله لا
انا ضربت وانضربت معاهم في الشارع وجاي معاهم في البوكس ومش هامشي من هنا غير وهما معايا
المامور قالي ليه كده

دكتور ايمن نور واستاذ ايهاب الخولي فضلوا يتكلموا معانا ويشجعونا اننا منخفش ووصوا المامور علينا كان كلامهم لينا ادانا دافعه قويه جدا
وبعتوا جابولنا اكل وجابو بطانيه وقالولنا هنكون معاكو الصبح في النيابه الموضوع بسيط جدا ومفيش اي خوف منه
اتقفل باب الحجز بعد ما الناس مشيت
ياااااااااااااااه
لما اتقفل باب الحجز عرفت معني كلمه حبس

محمد عادل راح في النوم وقاعدنا انا وعمرو اسامه نتكلم طول الليل لحد ما هو كمان نام
معرفتش انام خالص دماغي كانت مشتعله بالتفكير حاولت انام معرفتش وقفت علي الباب بتاع الحجز وقعدت اتكلم مع العساكر ومندوبين الشرطه الي واقفين بره
قعدت مع نفسي طفيت النور واقسمت ان انا مش هسيب السياسه غير لما يحصل تغييرفي البلد
الاحساس بالظلم شيئ رهيب ولما تحس بطعم الظلم تحس ان فيه مراره رهيبه شعور غريب ممكن يدفعك تعمل اي حاجه
لكن الحمد لله اتغلبت علي الاحساس الرهيب ده
الصبح الساعه حوالي 8 ص اتكلبشنا و اتجهنا للنيابه
قعدنا في حجز قزر جدا
فضلنا في الحجز ده من الساعه 8 الي الساعه 4 لحد ما اتعرضنا علي النيابه
حجز اخر ارف
الارض وسخه ومفيش مكان تعرف تقعد فيه والريحه لا تطاق الساعه في الحجز ده كانت بتعدي علينا كانها يوم كامل كنا بنتحايل عليهم علشان يدونا ورقه نقعد عليها .
الشبكه العربيه لحقوق الانسان بعتت لنا 3 بطاطين ومفيش حاجه منهم وصلت واصدقانا باعتولنا اكل وحاجات كتير اتقلبت (عرفنا دا بعد ما طلعنا)
محمد عادل اتعرض اول واحد علي النيابه قعد حوالي ساعه
بعد كده اتعرضت انا علي النيابه وكنت شبه منهار من قله النوم ومن الحجز المعفن الي كنا فيه لكن اتماسكت علي قد ما قدرت
المحضر كان مكتوب فيه اننا كنا بنوزع مانشورات تثير الراي العام وتحث وتعمل بلبله بين المواطنين
وحضر التحقيق محامين كتير من كذا منظمه حقوقيه
بعد كده رجعونا القسم مره تانيه
اكتر حاجه كانت شاغلاني انهم في البيت هيقلقوا علي اوي علشان ميعرفوش انا فين
(بعد ما خرجت عرفت ان اخويا كلم احمد بدوي
احمد بدوي ادي نمره اخويا للدكتور ايمن نور وهو كلمه ودا خلاهم يتطمنوا شويه في البيت)

اوسخ واحقر واصعب موقف نزول زنزانه الجنائي

لما رجعنا القسم افتكرنا اننا هنقعد في نفس الحجز الي كنا فيه لكن علشان احنا استخدمنا حق من حقوقنا ورفعنا قضيه علي الضابط الي اعتدي علينا امناء الشرطه بالضرب قدامه
عاقبنا المأمور علي استخدام هذا الحق في انه خلاهم نزلونا في زنزانه بتاعت الجنائين وقعد يدور علي اوسخ زنزانه علشان ينزلنا فيها
اول ما دخلنا الزنزانه لقينا نفسنا في وسط اكتر من 50 شخص منهم الي لابس فانله حملات ومنهم الي قاعد من غيرها
الموقف كان صادم
اشكال كلها سوابق مفيش حد فيهم مش عامل علي جسمه وشم دا غير الي واخد ضربه في وشه والي ايده متقطعه(شكلها متقطعه بموس)
احنا اتصدمنا وعمرو اسامه كان باين عليه الخوف اوي
وهما حسوا اننا خايفين
انا بصيت لمحمد وعمرو اسامه وقلتلهم عادي خالص مفيش اي مشكله زي ما انا اعمل اعملوا وملكوش دعوه

واحد راح قايم وقال:ايه يا جدعان انتوا بتبصوا كده ليه احنا كلنا بنادمين زي بعض
رديت عليه:بنادمين ايه يا ريس
احنا مش بهوات
احنا مش بهوات انا من امبابه يعني كلها شبه بعضها(انا كنت صايع وانا صغير) هع هع هع

واحنا بقالنا يومين منمناش وانضربنا بما فيه الكفايه علشان كده احنا مش مركزين
وبعدين احنا جايين هنا علشانكوا احنا سياسين مش جاين في قضيه جنائيه
والي بنعمله دا كله علشان نجيب حقوق الناس الي ضايعه في البلد
المهم عرفت ان في ناس من امبابه رحت اتكلمت معاهم ونديت علي محمد وعمرو وقاعدنا معاهم
واتكلمت بصوت عالي مع الناس كلها اننا حركه سياسيه وان الدكتور ايمن نور (استغليت اسمه علشان هو معروف انه سياسي) كان موجود هنا امبارح بيسأل علينا
وحصل تحول في الامور
ابتدا محمد وعمرو اسامه يفكوا التنشنه بتاعتهم وبداوا يتكلموا مع الناس في السياسه ولموا حواليهم ناس كتير وقعدو يتكلموا معاهم
وانا كنت بتكلم مع ناس تانيه علشان اضبط النوم والقاعده (كنا فاكرين اننا هنقعد 4 ايام)
الناس اتجوبت معانا جامد وقعدوا يسمعونا
وانا كنت حاسس اننا ممكن نعمل ثوره من جوه القسم
واتقلب السحر علي الساحر وبدل ما نتبهدل في الزنزانه عملنا جوه شغل جامد
احنا قاعدنا جوه الزنزانه دي حوالي ساعه او اقل
لو كنا قاعدنا اكتر من كده كنا هنسببلهم مشاكل كتير وكنا هنعمل حركه جديده داخل سجن الازبكيه

بعد كده مشينا من الزنزانه فيشونا ورحنا اتعرضنا علي امن الدوله علي هشام العراقي اتعرضنا انا وعمرو اسامه بس ومحمد راح علشان يعمل تقرير طبي
وكان قاعد معاه اثنين من اصدقائنا
وكنا خلاص هنمشي حضر الاستاذ ايهاب الخولي ودخل يتكلم مع هشام العراقي وخدنا حاجتنا ومشينا
اول لما خرجنا لقينا ناس كتير واقفه مستنيه خروجنا مش هاذكر اسامي علشان مانساش حد
[/size]

 

قد يعجبك ايضا
تعليقات
Loading...