شباب 6 ابريل
من حق جيلنا أن يجرب فإما أن ينجح و إما أن يقدم تجربة تستفيد منها الأجيال

مدرسة الاستاذ عبد العال الناظر … للشاعر محمد ربيعي

854

حنيت فى مرة لايام زمان

و رجعت بالذاكرة عمناول

واحنا فى سنة اولى اول

فى منتصف العام الدراسى

اخدت كتابى وكراسى

ودخلنا الفصل الدراسى

وقعدنا عالكراسى

الحصة الاولى لغة عربية

دخل الاستاذ جلال ابن الاستاذ عبد العال الناظر

بطريقتة المضحكة المشهورة

ووقف وكتب عالسبورة

حروف شفناها قلنا يا ساتر

ح ب س حبس

حبس يا ولاد فعل ماضى

كانوا بيلجاوا لية زمان عالفاضى

ما لهوش وجود فالايام دية

عارفين لية

علشان بقى فية ديموكراتية

او من باب التغيير

نقدر نقول حرية تعبير

احفظوا المصطلحات دية

حتنفعكوا فى مواضيع الانشاء

وجلس وقال فى زهو

نتيجة امتحان الاملا والنحو

وجلسنا فى منتهى الاصغاء

وطبعا كان هيثم ابن اللوا فلان الفلانى

جايب الدرجة النهائية فى الامتحان الاخرانى

غمزلى زميلى اللى جانبى بجسمة

وقالى: دة مبيعرفش يكتب اسمة

قلتلة وطى صوتك هو احنا راح نناسبة

وبص ليا وقالى

اما انت يا عبد العزيز

فعليك حاجات تغيظ

بقى يضرب فعل مضارع يا صايع

قلت: امال هو اية يا استاذ

هو: طبعا يا غبى تمييز

انا: ازاى يا استاذ

هو: اخرس يا وغد

اللى حيقدر يضرب دة

يبقى كدة اى حد؟

انا: بس انا متاكد يا استاذ

هو:انت تقول وتتاكد براحتك

وانا اعمل اللى انا عايزة

انا ادرى بمصلحتك

******

وعدى الوقت وفات وجت حصة الرياضيات

ودخل الاستاذ هلال اخو الاستاذ جلال ابن الاستاذ عبد العال الناظر

وقال

واحد زائد واحد يساوى كام يا حلوين

اتنين يا استاذ

الصلاة على الزين

شاطرين

درس النهاردة عن المجموع والمطروح

واهم حاجة ياولاد يبقى عندكو طموح

يعنى انا مثلا مش حلمى مش بيت ولا قصر

لا انا بحلم ازاى تكون عندى شقة فالهرم

وافتحها على اختها اللى فى مدينة نصر

واعيش بقى فى براح

بين الغرف سواح

*****

وفى حصة اللياقة البدنية

دخلت الابلة منال مرات الاستاذ هلال اخو الاستاذ جلال ابن الاستاذ عبد العال الناظر

وقالت

انا حاسيبكوا شويتين يا عيال

اللى عاوز ياكل واالى عاوز يشرب

واللى عاوز يجيب شيبسى من عند البقال

بس اهم حاجة تكونوا جاهزين

لما يجى وقت المونديال

ومش عاوزة اسمع حس فاهمين

اعتبرينا يا ابلة نايميين

وفى حصة الاحياء دخلت الابلة هناء اخت الابلة منال مرات…….عبد العال الناظر

وفى حصة الفيزياء دخل الاستاذ علاء ابن مرات اخت ست بنت…….عبد العال الناظر

وفى حصة الكيمياء دخلت ابلة رجاء بنت عم خال……ام اللى جابو الاستاذ عبد العال الناظر

باة هى دى مناظر

يا مغيث يا مغيث

ادى اخرة التوريث

دى بقت مدرسة عائلية يا ولاد الاية

لاتقولى نهضة تعليمية باة ولا ابصر اية

من كل شجرة جايبين لنا فرع

واية يا ابن عمى

تحف بديعة الصنع

وتدوب الايام والسنين زى الشمع

وفى نهاية مرحلة التعليم الاساسى

كان امتحان شفوى

فى مادة الجغرافيا بالطبع

وكان السؤال الاساسى

اية اكتر محصول بيتزرع فى بلدنا كتير

جاوبنا فى نفس واحد بدون تفكير

القرع

قد يعجبك ايضا
تعليقات
Loading...