شباب 6 ابريل
من حق جيلنا أن يجرب فإما أن ينجح و إما أن يقدم تجربة تستفيد منها الأجيال

من يوم ميلادي يابلادي

874

من يوم ميلادي يابلادي

وانا غرقان لشوشتي عشق

في بحورك ونيلك

ونهارك وليلك

واكمني منك لو غبت عنك

روحي بتسيبني وتجيلك

والاقيني غصب عني بعرقي اغنيلك

غنوة امل في سكه ضلمه

ياحلوه ياسلمى

ياام الولد والبت

يااجمل وأجدع ست

اطلبي مايرضيكي

لو موتي يصحيكي اخد من عمري واديلك

لو دمعي يرويكي تني ابكيلك

لحد ما جلدي يتشقق زي غيط بايره

ياحبيبتي ياحايره

في ملكوت ربنا دايره

من سبعتلاف سنه

كلهم مشيوا مع الدنيا وفاتوكي هنا

وحدك قصاد الزمن

ومعاكي ربنا

ومعاكي انا بتكويني

ارمي تحت اقدامك سنيني

ولو انتي فوتيني هاتشعبط في جلابيتك

علشان ما أفوتكيش

هعيش ليكي وبيكي ودونك مش هعيش

وان قسيتي هتلاقيني مرتمي في حضنك

وليكي منك هشكيلك

وفي كل سجده هدعيلك

يحميكي ربنا ويصونك

من كل ايد بتخونك

ويكون سندك وعونك على خفافيش الوطن

فاحت ريحة العفن في كل اركانك

وتمانين مليون كفن

نايمين في ساعة صحيانك

متجمدين في درجة غليانك

مين اللي خانك ومين اللي شال الهم

مين اللي حارب

مين اللي دفع الدم

مين اللي قبض التمن

مين اللي وطى للزمن

مين اللي زرع الخير

وحصد الشر

مين اللي خنق الضمير

مين اللي فر

لما صرختي في العباد

حي على الجهاد

مين اللي جالك في الميعاد

وكان قد الندا والعهد

مين اللي خلف وياكي

الف وعد ووعد

من يوم ميلادي يابلادي

وحروفك بتجري على لساني

يادليلي وعنواني

ياناسي وخلاني

وحب اتولد في ربوعك

اقطعي من لحمي ياحبيبتي

وسدي جوعك

خدي من دمي ياحبيبتي

واروي نجوعك

ولفي في كفني كل أتواب البلا

واوعاكي تحكي لعيالي اللي جرا

في سنين الخنا والغدر

لما اخويا اتحرق في القطر

وامي وابويا اترموا في البحر

وانا بغني غنوتين للصبر

غنوه علشانك والتانيه علشاني

وسهام الغدر مزروعه ورايا

التقيتني بجري بسرعه ف مكاني

اصرخ …

تتكتم صرختي جوايا

اصرخ …

الاقي ايد حاضنه قفايا

تضرب ..

اغني غنوتين الصبر

امانه ياحبيبتي تغنيهم معايا

وتكتبيهم لما اموت على القبر

الكاتب : [url=http://www.facebook.com/profile.php?id=1517797645]Ahmed Saad[/url]

قد يعجبك ايضا
تعليقات
Loading...