شباب 6 ابريل
من حق جيلنا أن يجرب فإما أن ينجح و إما أن يقدم تجربة تستفيد منها الأجيال

هنا القاهرة وليس الجابون

958

هتسالنى إية هى الجابون ولية بتقارنها بالقاهرة
هرد عليك واقولك ان الجابون دى بلد فى وسط افريقيا من شهري كدا مات الرئيس بتاعهم بعد مافضل كابس على نفس شعبها مدة طويلة وكابس دى وجه مقارنة اول
المهم انه بعد ما مات الشعب ماسلمش منه واترشح ابنه لانتخابات الرئاسة عن الحزب الوطنى الجابونى هو تبعا ماسموش كدا لكن دا وجه مقارنة تانى

وطبعا نجح ابن الريس وبقى رئيس للدولة وقامت الدنيا فى الجابون والمعارضة جابت انصارها وقعدت فى الشوارع ليل نهار تقول الإنتخابات مزورة ولازم تنعاد وشوية مظاهرات هنا على احتجاجات هناك وشكرا بردو مسك على بنجو (دا اسمه على فكرة) والمعارضة اللى مش بونجية عملتلها كام شو كويسين وكسبتلها كام زبون ينضمو للاحزاب بتاعتهم
هتقولى طب مال دا بالقاهرة ولية بتربط بينهم واية وجه المقارنة
هقولك ان رغم اوجه المقارنة الموجودة إلا ان الجملة مش للمقارنة لكنها جملة اعتراضية بنحاول نوصل بيها رسالة اننا ضد ان يحصل فى القاهرة نفس اللى حصل فى الجابون

[b]هنا القاهرة وليس الجابون[/b]
بتحمل رسالة منا للمعارضة إنها تتحرك قبل الإنتخابات الرئاسية مش تستنى لما جمال ينجح وبعدين تقعد تصرخ تمنع التزوير مش تستنى لما يحصل وبعدين تقعد تشتكى
تستعد لمواجهة التوريث بخطة فعالة تتفق على بديل رئاسى وعلى شكل مرحلة التغيير مش تضيع وقتها فى الكلام والتحليل وتستنى لما يحصل توريث وبعدين تقعد تترسم عليك ةوتقولك اهو كلامنا طلع صح صدقت ياعم إنهم كانو بيخططو للتوريث
رسالة بنقول فيها للمعارضة ان منع الجريمة افضل من معاقبة الجانى

[b]هنا القاهرة وليس الجابون[/b]
رسالة تنبيه للشعب المصرى بنفكرو بيها انه شعب صاحب تاريخ وحضارة فبلاش نقارن نفسنا بأى حد بنفكرو ان انتصر فى اكتوبر لما قدر انه يتخلص من روح اليأس اللى سادت بعد النكسة
رسالة بنقول فيها اننا مش الجابون ومش سوريا واننا جمهورية مش مملكة
فمش لازم نستسلم لسياسة الامر الواقع اللى بيحاولو يفرضوها علينا
رسالة للشعب المصرى بنقوله فيها اننا عندنا 80مليون بديل

[b]هنا القاهرة وليس الجابون[/b]
رسالة تحذير للحزب الوطنى (لمصرى مش الجابونى طبعا)بنقول فيها ان القاهرة فاض بيها الكيل من كتر اللى عانته من نهب وتخريب لثروتها وتهميش لمكانتها بين الدول وانها خلاص بتفوق وهتتصدى هى وشبابها لاى محاولة توريث تساهم فى استمرار الوضع المشين دا ,ان ماسهمتش فى انه يبقى اسواء
رسالة بنقول فيها للحزب الحاكم ان مصر لم يعد يسعدها ان تظل مصر مبارك وانها عاوزة ترجع تانى مصر ام الدنيا
هنا القاهرة وليس الجابون فهل ينتبه العاقلون

[b]بقلم: عمر علي[/b]

قد يعجبك ايضا
تعليقات
Loading...